Летонскиот премиер Андрис Кулбергс од седиштето на НАТО во Брисел испрати директна порака до Москва, нагласувајќи дека со земјите од источниот дел на Алијансата „нема шега“.
За време на средбата со генералниот секретар на НАТО, Марк Руте, Кулбергс истакна дека присуството на сојузничките сили во балтичкиот регион претставува јасен доказ за единството и подготвеноста на Алијансата да ја брани секоја своја членка.
„Ова е јасна демонстрација на силните трансатлантски врски, сојузничкото единство и цврстата посветеност на членот 5 од Северноатлантскиот договор“, изјави Кулбергс.
Според НАТО, на средбата било разговарано за безбедноста на источниот дел од Алијансата, за присуството на сојузнички трупи и воздухопловни сили во балтичкиот регион, како и за подготовките за претстојниот самит на НАТО. Во моментов, 14 земји членки на Алијансата учествуваат во заеднички активности и обуки во Летонија.
Посетата доаѓа во период на засилени безбедносни тензии во Европа и во време кога сојузниците настојуваат да испратат јасна порака дека секој обид за дополнителна дестабилизација ќе наиде на координиран одговор.
Марк Руте посочи дека неодамнешните инциденти со беспилотни летала во близина на источните граници на НАТО ја потврдуваат потребата од високо ниво на подготвеност.
„Таквите инциденти покажуваат опасни и непромислени постапки од страна на Русија. Но, истовремено ја потврдуваат решителноста и способноста на НАТО да одвраќа и да се брани. Ниту една членка не стои сама во рамките на Алијансата“, изјави Руте.
Тој ја поздрави и поддршката што Летонија ѝ ја дава на Украина, особено преку меѓународната коалиција за беспилотни системи, нагласувајќи дека одбранбените издатоци на земјата оваа година се очекува да достигнат речиси пет проценти од бруто-домашниот производ.
Во меѓувреме, летонскиот претседател Едгарс Ринкевичс предупреди дека НАТО мора да биде подготвен и за најлошите сценарија, оценувајќи дека Русија останува непредвидлив и сериозен безбедносен предизвик.
„Доколку дојде до напад врз балтичките држави, тоа ќе претставува напад врз НАТО и Европа. Такво сценарио неизбежно би ги вклучило Полска, Германија, Велика Британија и останатите сојузници“, порача Ринкевичс.
