Портпаролот на ВМРО-ДПМНЕ, Валентин Манасиевски, на денешната прес-конференција обвини дека Левица го блокира усвојувањето на новиот Изборен законик, иако, според него, претходно бил постигнат консензус за барањата што ги поставила оваа партија.
Манасиевски изјави дека ВМРО-ДПМНЕ ги прифатило сите предлози на Левица во процесот на подготовка на новиот Изборен законик, вклучително и барањето за поголемо финансирање на изборната кампања од Буџетот.
Според него, Левица во јавноста како причина за неподдржување на законикот ја наведува потребата од една изборна единица, иако, како што рече, вистинските мотиви се поинакви.
Тој обвини дека Левица, заедно со СДСМ, го блокира донесувањето на Изборниот законик и покрај претходно постигнатиот договор меѓу политичките партии.
Во своето обраќање, Манасиевски упати и политички критики кон лидерот на Левица, Димитар Апасиев, оценувајќи дека ваквиот пристап нема поддршка кај граѓаните и дека тоа, според него, се потврдува и во анкетите.
