Лидерот на СДСМ: Мицкоски ја изолира Македонија и се претставува како нејзин заштитник

Претседателот на СДСМ, Венко Филипче, го обвини премиерот Христијан Мицкоски дека ја изолирал Македонија од Европа и дека, во услови кога, според него, власта нема резултати, повторно се отвораат меѓуетнички теми и тензии.

Во интервју за „Тема на денот“ на Сител, Филипче рече дека Мицкоски изградил, како што се изрази, „ѕид околу Македонија“, по што себеси се претставува како главен заштитник на јазикот и идентитетот.

— реклама —

„Христијан Мицкоски изгради ѕид околу Македонија и сега тој се претставува како главниот заштитник во рамките на таа тврдина, на јазикот, идентитетот и така натаму. А времето покажува дека сето тоа е веќе заштитено со договорите коишто биле постигнати во наше време“, рече Филипче.

— реклама —

Според него, политиката на актуелната власт се темели на создавање чувство на страв и загрозеност во однос на македонскиот јазик и идентитет, иако, како што тврди, тие прашања веќе биле заштитени со договорите постигнати во времето на СДСМ.

Филипче оцени дека цената на таквата политика е изолација на државата од европскиот развој и перспективата што, според него, ја сакаат граѓаните.

— реклама —

„Надвор од тој ѕид е Европа, развојот, надвор од тој ѕид е тоа што граѓаните го сакаат“, рече лидерот на СДСМ.

— реклама —

Тој додаде дека, кога власта нема резултати и кога, според неговата оценка, системот се распаѓа, се посегнува по теми што создаваат поделби во општеството.

„Што се случува кога се распаѓа системот и повеќе нема пари, а до тоа нè донесе оваа Влада? Се будат духовите од минатото, меѓунационална омраза, тензии и тоа е сè што сега се случува. Ништо друго“, изјави Филипче.