Литванскиот претседател предупредува: Путин сè почесто ги тестира границите на НАТО

Литванскиот претседател Гитанас Науседа предупреди дека Русија сè почесто ја проверува подготвеноста на НАТО за заеднички одговор на безбедносните закани. Иако смета дека Москва во моментов нема капацитет за голем конвенционален напад врз територијата на Алијансата, очекува продолжување на провокациите, вклучително и саботажи, кибернапади и упади со беспилотни летала.

— реклама —

Во интервју за германскиот весник „Велт“, Науседа изјави дека руските воени ресурси во голема мера се насочени кон боиштето во Украина, каде што, според него, Москва не постигнува успех. Сепак, тој предупреди дека рускиот претседател Владимир Путин сè повеќе се приближува до границите на членот 5 од Северноатлантскиот договор, кој предвидува колективна одбрана на членките во случај на вооружен напад.

Литванскиот претседател смета дека Русија преку хибридни активности се обидува да утврди колку далеку може да оди без да предизвика заедничка реакција на НАТО. Според него, ваквите активности нема да бидат ограничени само на земјите од источното крило на Алијансата, туку може да продолжат и во Германија, Данска и други европски држави.

— реклама —

Меѓу можните активности ги посочи упадите со дронови, кибернападите, саботажите и подметнувањето пожари. За дел од ваквите инциденти европските власти се сомневаат дека зад нив стои Русија, иако нејзината одговорност не е потврдена во секој случај.

— реклама —

Науседа се осврна и на војната во Украина, оценувајќи дека Москва засега нема искрен интерес за мировен договор и дека во текот на зимата ќе продолжи со нападите врз украинските градови. Тој очекува Русија да поставува барања за кои однапред знае дека се неприфатливи за Киев, со што ќе го отежнува постигнувањето договор.

Според литванскиот претседател, доколку Украина ја преброди зимата, можностите за сериозни мировни разговори би можеле да се подобрат во 2027 година. Тој не очекува значителен напредок во преговорите пред тој период.

— реклама —

Неговите изјави доаѓаат во пресрет на најавената нова рунда разговори меѓу претставници на САД, Украина и Русија, планирана за 10 и 11 ноември во Абу Даби. Специјалниот американски пратеник Стив Виткоф најави дека на средбите ќе се разговара за безбедносните прашања по завршувањето на војната, намалувањето на тензиите, хуманитарните прашања и можните чекори кон завршување на конфликтот.