Поранешниот премиер Љубчо Георгиевски реагираше на иницијативата на бугарскиот пратеник Костадин Костадинов, според која во бугарската правна рамка македонскиот јазик би се третирал како дијалект на бугарскиот, оценувајќи дека тоа може да биде основа во следна фаза македонскиот да биде прогласен за официјален јазик во Бугарија.
„Пратеникот Костадинов дал иницијатива со која во бугарската правна рамка македонскиот јазик би се третирал како дијалект на бугарскиот јазик“, напиша Георгиевски.
Тој иницијативата ја коментираше со предлог за спротивен следен чекор.
„Ова е добра основа во втора фаза да биде прогласен и за официјален во Бугарија“, порача Георгиевски.
Во објавата, поранешниот премиер се осврна и на историскиот процес на стандардизација на бугарскиот јазик.
„На тој начин ќе се исправи краткогледоста од пред 150 години кога дијалектите од северноисточното ќоше на бугарскиот јазичен простор беа прогласени за официјални“, напиша Георгиевски.
Станува збор за став на Георгиевски објавен на социјалните мрежи, како реакција на иницијативата што, според него, ја поднел Костадинов.
