Зоран Љутков преку објава на социјалните мрежи упати критики до поранешната министерка за култура Бисера Костадиновска-Стојчевска, поставувајќи повеќе прашања поврзани со проектот „Скопје 2028“.
Во објавата, Љутков тврди дека за време на нејзиниот мандат бил најавен проект вреден 150 милиони евра, но, според него, јавноста сè уште нема добиено одговори како е утврдена таа сума, врз основа на кои проценки, од кои извори требало да се обезбедат средствата и каде конкретно требало да бидат инвестирани.
Тој прашува и дали тогашната Влада донела одлука за обезбедување на тие средства или, како што наведува, станувало збор за политичко ветување без финансиска подлога.
Во објавата, Љутков наведува дека биле потребни повеќе посети во Брисел за да се зачува титулата „Скопје 2028“, а поставува и прашања за изборот на фирмите, невладините организации и надворешните соработници кои учествувале во подготовката на апликацијата.
На крајот, тој оценува дека „Скопје 2014“ денес е една од најпосетуваните туристички атракции во главниот град, посочувајќи дека тоа, според него, го потврдува интересот на туристите.
