„Лошо се менаџира кризата, нема систем, граѓаните се оставени сами да се справуваат“, вели Филипче од Гостивар

Претседателот на СДСМ, Венко Филипче, при денешната посета на Гостивар оцени дека кризата со водата се менаџира лошо и дека, според него, надлежните институции не обезбедуваат јасни одговори за состојбата и мерките што се преземаат.

— реклама —

Филипче побара одговори кој во моментов ја координира кризата, особено, како што рече, во услови кога нема директор на јавното претпријатие, и постави прашања за контролата на водата што се користи во угостителските објекти и на јавните собири.

— реклама —

„Зошто не се испитувала водата секој ден? Кој сега ја менаџира состојбата? Со каква вода се мијат чиниите и приборот во рестораните? Од каде се обезбедува техничката вода и кој потврдил дека таа е безбедна за употреба?“, праша Филипче.

Тој предупреди дека, доколку не се користи безбедна вода, постои ризик од дополнителни здравствени последици, вклучително и труење со храна и појава на заразни заболувања.

— реклама —

Според Филипче, институциите мора да дадат јасни одговори за начинот на кој се управува со кризата и за мерките што се преземаат за заштита на здравјето на граѓаните.

— реклама —

Воедно, тој ја критикуваше Владата, оценувајќи дека не успева соодветно да се справи со кризата и дека, според него, граѓаните се оставени сами да се соочуваат со последиците.