Ловеле во време на забрана, полицијата им пронашла пушки и месо од дивеч

Две лица од селото Бистренци, Демиркаписко, биле лишени од слобода поради сомнение за незаконит лов, откако полицијата при претреси во нивните домови пронашла ловечко оружје, предмети за лов и месо од диви животни.

— реклама —

Како што соопшти МВР, на 12 ноември во 19:10 часот полициски службеници од ОВР Неготино ги лишиле од слобода М. М. (66) и Т. М. (76). Претходно, од ловечкото друштво „Вардар“ од Неготино било пријавено дека на 10 ноември, на ловиштето „Корешница“ во Бистренци, биле забележани две лица кои поставувале недозволени предмети за лов на диви животни и ловеле во период кога ловот е забранет.

— реклама —

— реклама —

По судска наредба од Основниот суд во Кавадарци биле извршени претреси во домовите на двете лица. Во домот на М. М. биле пронајдени и одземени предмети за лов, ловечки патрони, ловечка пушка и месо од различни видови диви животни. Во домот на Т. М. биле пронајдени пушка, предмети за лов и дозвола за оружје со измината важност.

— реклама —

Двајцата биле приведени во полициска станица, а за случајот бил известен јавен обвинител. По целосно документирање на настанот, против нив ќе бидат поднесени соодветни пријави.