45-годишна жена од Скопје е лишена од слобода по пријава дека подолг период физички и психички ја малтретирала својата 13-годишна ќерка.
Од МВР информираат дека Х.Ѓ. била лишена од слобода денеска, 3 септември, во 2:20 часот, во Скопје. Полицијата постапувала по претходна пријава за семејно насилство во дом на подрачјето на Гази Баба.
Според пријавеното, мајката подолг период физички и психички ја малтретирала малолетната ќерка, која, како што е пријавено, често ја држела заклучена во една од собите во домот.
За случајот биле известени јавен обвинител, инспектор за малолетници и Центарот за социјални работи.
По целосното расчистување и документирање на случајот, од МВР најавуваат дека ќе следува соодветна пријава.
