Портпаролот на ВМРО-ДПМНЕ, Валентин Манасиевски, денеска изјави дека Македонија нема да спроведе уставни измени без јасни и писмени гаранции од Европската Унија, обвинувајќи ги СДСМ и нивните поранешни политики за отстапки без конкретен резултат во евроинтегративниот процес.
На прес-конференција, Манасиевски оцени дека државата веќе платила висока цена со промената на уставното име и порача дека актуелната Влада нема да прифаќа нови условувања без претходно обезбедени гаранции.
„Овој пат уставни измени без јасни, цврсти и писмени гаранции во форма на заклучоци од ЕУ – нема да има“, изјави Манасиевски.
Тој нагласи дека, според ставот на ВМРО-ДПМНЕ, Македонија нема повторно да прави отстапки без сигурност дека тие ќе значат реален напредок во процесот на пристапување кон Европската Унија.
Во обраќањето упати критики и кон претседателот на СДСМ, Венко Филипче, наведувајќи дека треба да пренесе до бугарските власти дека Македонија очекува исполнување на обврските, вклучително и почитување на пресудите на Европскиот суд за човекови права во Стразбур.
„Додека не видиме испорака од нивна страна, Македонија нема да се помести ниту милиметар од својата политика“, порача Манасиевски.
Тој додаде дека Владата останува посветена на европската интеграција, но без прифаќање на нови условувања што не се проследени со конкретни гаранции и заштита на националните интереси.
