Македонија има само 10 гнездечки парови египетски мршојадци, МЕД се вклучува во меѓународен проект за нивна заштита

Египетскиот мршојадец денес е една од најзагрозените птици грабливки во Европа. Во Македонија се евидентирани околу 10 гнездечки парови, а во следните пет години Македонското еколошко друштво (МЕД) ќе учествува во меѓународен проект за подобрување на условите за нивно опстојување.

Проектот „Безбедно враќање на египетскиот мршојадец“ (LIFE EV Safe Return), кофинансиран преку програмата „Лајф“ на Европската Унија, ќе ги опфати местата за размножување, преселните патишта и областите на презимување на овој вид. Во него, покрај МЕД, учествуваат уште 14 организации и институции од Европа, Блискиот Исток и Африка, под координација на Бугарското друштво за заштита на птиците.

— реклама —

Кај нас египетскиот мршојадец гнезди во Демиркаписката Клисура, Тиквешкиот регион, Мариово, долината на Брегалница и други непристапни подрачја. Иако некогаш бил широко распространет низ Балканот, денес во Македонија, Бугарија, Грција и Албанија има вкупно околу 50 гнездечки парови. По повеќе од три децении опаѓање, во последните години се забележуваат знаци на стабилизација, особено во Бугарија.

— реклама —

Едни од најголемите закани за видот се нелегалните отровни мамки, криволовот и струјните удари од небезбедни далноводи. Секоја есен птиците го напуштаат Балканот и прелетуваат повеќе од 5.000 километри до местата за презимување во Африка.

Во рамките на проектот, МЕД ќе ја следи бројноста на кањите во Македонија, ќе работи на отстранување на заканите и ќе ги вклучува локалните заедници во заштитата. Предвидени се и активности за зачувување на традиционалното сточарство, од кое зависи опстанокот на видот.

— реклама —

Во Бугарија и Грција најмалку 40 египетски мршојадци, одгледани во европски зоолошки градини или спасени од дивината, ќе бидат пуштени во природа и следени со ГПС-предаватели. Во пет земји ќе се спроведуваат и образовни програми во кои ќе бидат опфатени повеќе од 4.000 ученици, наставници и млади природозаштитници.

— реклама —

„МЕД ќе ја следи бројноста на кањите во Македонија, ќе работи на идентификација и елиминирање на директните закани и ќе ги зацврстува врските со локалното население“, истакнува Методија Велевски, орнитолог и програмски директор на друштвото.

Активностите се надоврзуваат на досегашните проекти на МЕД за спречување на труењето на дивите животни и намалување на ризиците од струен удар и судир со енергетската инфраструктура.