Бугарска фондација најави блокада на граничните премини меѓу Бугарија и Македонија во недела

Во недела се очекуваат привремени блокади на граничните премини меѓу Бугарија и Македонија, откако бугарската организација „Македонија“ најави протестна акција што ќе трае два часа, пренесуваат бугарските медиуми.

— реклама —

Според информациите објавени во бугарските медиуми, блокадите ќе бидат организирани на граничните премини „Деве Баир“, „Делчево“ и „Ново Село“, а организаторите тврдат дека за нивното одржување добиле дозвола од бугарското Министерство за внатрешни работи.

— реклама —

Најавата доаѓа ден по инцидентот пред Амбасадата на Бугарија во Скопје, кога беа запалени две возила со дипломатски таблички. Осомничениот за случајот беше брзо идентификуван и приведен, а настанот беше осуден и од македонските и од бугарските власти.

— реклама —

Во повикот за протест организацијата наведува дека блокадата претставува порака до македонската Влада и премиерот Христијан Мицкоски.

— реклама —

„Нашата цел е да му покажеме на Мицкоски дека не може да продолжи со репресиите. Не ни е цел да ги попречуваме граѓаните и нивниот слободен премин преку границата, затоа блокираме два часа, а не трајно. Дојдете и покажете единство и сила“, се наведува во повикот на организацијата.