Македонија организира четири чартер летови за евакуација на граѓани од регионот на Блискиот Исток, слободните седишта се за соседните држави

Премиерот Христијан Мицкоски информираше дека денеска започнува евакуацијата на македонски државјани од регионот на Блискиот Исток, при што првата група граѓани се враќа од Дубаи во Скопје.

— реклама —

Тој посочи дека покрај летот од Обединетите Арапски Емирати, Владата организира и дополнителни чартер летови за евакуација на граѓани од други земји во регионот.

— реклама —

„Првата група која ја евакуираме од Дубаи за Скопје е денеска. Имаме организирани чартери од Саудиска Арабија кои треба да ги прифатат граѓаните од Катар и Кувајт кои треба да заминат во среда. Има четири чартер летови, имаме десетици слободни места. Дел од државите во регионот замолија и нивни граѓани да донесеме. Од некогаш слабата Влада која молеше за 5.000 вакцини, сега сме фактор на стабилност“, изјави Мицкоски.

— реклама —

Министерството за надворешни работи и надворешна трговија соопшти дека евакуираните македонски државјани од Обединетите Арапски Емирати се очекува да слетаат на Меѓународниот аеродром Скопје вечерва околу 21:15 часот.

На аеродромот патниците ќе ги пречека министерот за надворешни работи и надворешна трговија, Тимчо Муцунски.