Македонија во првите седум месеци од 2026 година ја посетиле 741.446 туристи, при што е забележан раст на бројот на странските гости, соопшти Министерството за култура и туризам по повод 27 Септември – Светскиот ден на туризмот.
Од Министерството упатија честитки до туристичките работници, чинителите во туристичкиот сектор и граѓаните кои со својот труд, знаење, посветеност и гостопримство придонесуваат за развојот и меѓународната промоција на македонскиот туризам.
Овогодишната тема на Светскиот ден на туризмот, утврдена од Светската туристичка организација при Обединетите нации (UN Tourism), е „Дигиталната агенда и вештачката интелигенција за редизајнирање на туризмот“. Темата ја нагласува сè поголемата улога на современите технологии и иновациите во развојот на туристичкиот сектор, при што човекот и автентичното туристичко искуство остануваат во центарот.
Меѓу најбројните странски туристи во Македонија во овој период биле гостите од Турција, Германија, Србија, Романија и Албанија.
Министерството наведува дека туризмот се препознава како значаен фактор за економскиот и општествениот развој на државата, а како приоритети ги посочува вреднувањето и промоцијата на културното и природното наследство, развојот на квалитетни и одржливи туристички производи и услуги и примената на современи дигитални решенија.
Во таа насока, вештачката интелигенција и дигитализацијата отвораат можности за поефикасно управување со туристичките дестинации, подобро планирање и создавање поперсонализирани, поинклузивни и поквалитетни туристички искуства.
Од Министерството посочуваат дека позитивните движења во туристичкиот сектор се поттик за продолжување на активностите за негов одржлив развој, унапредување на туристичката понуда и континуирана промоција на Македонија како туристичка дестинација.
Целта, како што наведуваат, е развој на современ и конкурентен туристички сектор кој ќе ги следи светските трендови, истовремено зачувувајќи ги културните и природните вредности на земјата и создавајќи нови можности за граѓаните и економијата.
По повод Светскиот ден на туризмот, Министерството упати порака за заедничко градење на туристичка иднина на Македонија која ќе биде отворена, иновативна, одржлива и препознатлива во светот.
