И покрај исклучително ниските водостои на големите европски реки, кои влијаат врз производството на електрична енергија во повеќе земји, македонскиот електроенергетски систем останува стабилен и во моментов нема ризик за домашното снабдување, информираат од Министерството за енергетика, рударство и минерални суровини.
Од Министерството посочуваат дека внимателно ја следат состојбата во регионот и Европа, каде што реките Дунав и Рајна бележат исклучително ниски водостои, што се одразува врз производството на електрична енергија во земјите низ кои течат.
Како што наведуваат, во координација со АД ЕСМ и АД МЕПСО редовно се следат хидролошките параметри, расположливите резерви и прогнозите, со цел навремено да се реагира доколку дојде до промена на условите.
Според Министерството, акумулациите во земјава во моментов се исполнети околу 70 проценти, што овозможува сигурно и планирано производство на електрична енергија, додека хидроелектраните продолжуваат да обезбедуваат системски услуги неопходни за стабилно функционирање на електроенергетската мрежа.
Позитивни се и податоците за домашното производство. Во мај годинава во Македонија биле произведени 462.653 мегават-часови електрична енергија, со што биле покриени 96,5 проценти од домашната потрошувачка. Воедно, производството од хидроелектраните е зголемено за 76 проценти во однос на истиот период минатата година, а кај ветерните електрани е регистриран раст од околу 10 проценти.
Од Министерството оценуваат дека овие резултати се должат на постепената диверзификација на производствените капацитети, подобреното управување со акумулациите и вложувањата во обновливи извори на енергија. Во тек се инвестиции во нови производствени капацитети, модернизација на електроенергетската инфраструктура, батериски системи за складирање на електрична енергија и проекти што ќе ја зголемат флексибилноста на системот.
Во соопштението се нагласува и значењето на регионалната енергетска поврзаност, при што како клучни проекти се издвојуваат гасниот интерконектор со Грција, подготовките за интерконекторот со Србија, како и приклучувањето на земјава кон Вертикалниот гасен коридор, што треба дополнително да ја зајакне сигурноста во снабдувањето со природен гас и улогата на Македонија во европската енергетска мрежа.
