Македонија вечерва против Луксембург ги отвора квалификациите за ЕП 2028

Со дуелот против Луксембург, македонската ракометна репрезентација вечерва ги започнува квалификациите за Европското првенство во 2028 година. Избраниците на Кирил Лазаров ќе играат пред домашната публика во салата „Борис Трајковски“ во Скопје, со почеток во 19 часот.

— реклама —

Македонија ја има фаворитската улога, а победа на стартот би била значаен чекор кон обезбедување место на континенталниот собир. Сепак, избраниците на Лазаров ќе мора да бидат внимателни, бидејќи во групата 8 се и селекциите на Шведска и Грција.

— реклама —

Досегашните меѓусебни дуели се целосно на страната на Македонија. Двете репрезентации одиграле шест натпревари, на кои нашите ракометари забележале исто толку победи. На последната средба, во 2023 година, Македонија славеше на гостински терен со 28:23.

Посебно внимание привлекува можноста за репрезентативно деби на Дмитро Горига, украинскиот лев бек кој настапува за унгарскиот ПИК Сегед. Тој е едно од новите имиња во составот и се очекува да донесе дополнителен квалитет во играта.

— реклама —

Капитенот Филип Кузмановски, Марко Митев, Мартин Серафимов и останатите репрезентативци ќе се обидат со победа да го отворат квалификацискиот циклус.

— реклама —

По вечерашниот натпревар, Македонија во недела ќе гостува кај Грција во Халкида. Европското првенство во 2028 година ќе се одржи во Шпанија, Португалија и Швајцарија, а пласман ќе обезбедат првите две репрезентации од секоја група и четирите најдобри третопласирани селекции.