Македонската берза АД Скопје започнува нов проект чија цел е да им помогне на домашните компании полесно да обезбедат финансиски средства преку пазарот на капитал, односно со издавање акции и обврзници.
Проектот се реализира во соработка со Европската банка за обнова и развој (ЕБОР), согласно потпишаниот Меморандум за соработка, а неговата реализација ќе ја спроведуваат PwC Северна Македонија и PwC Хрватска.
Во програмата ќе бидат опфатени до десет македонски компании, кои ќе поминат низ независна проценка за нивната подготвеност за настап на пазарот на капитал. Освен тоа, тие ќе учествуваат во специјализирана академија за раководители и ќе добијат насоки и препораки за успешно обезбедување капитал преку берзанско финансирање.
Од Македонската берза очекуваат оваа иницијатива да поттикне поголем број компании да издаваат акции и обврзници, да ја збогати понудата на финансиски инструменти и дополнително да го зајакне развојот на домашниот пазар на капитал.
