Македонски безбедносни функционери во Орландо, на покана од програма на американското Министерство за правда

Директорот на Управата за финансиска полиција, Слободан Ивановски, заедно со директорите на Царинската управа и Бирото за јавна безбедност, учествува на годишната конференција на Меѓународната асоцијација на полициски шефови (IACP 2026), која се одржува во Орландо, Флорида, во Соединетите Американски Држави.

— реклама —

Македонската делегација учествува на конференцијата на официјална покана на Меѓународната програма за обука и помош при водење криминалистички истраги (ICITAP), која функционира во рамки на Кривичниот оддел при Министерството за правда на САД.

Како што соопшти Управата за финансиска полиција, на свеченото отворање на Генералното собрание биле истакнати предизвиците со кои се соочуваат безбедносните институции, со посебен акцент на меѓународната соработка, размената на информации, технолошката поврзаност и зајакнувањето на капацитетите за борба против организираниот криминал.

— реклама —

На конференцијата се презентираат современи технологии и иновативни решенија за откривање и спречување финансиски и други облици на криминал, кои, според Управата, можат да придонесат за поефикасно спроведување на предистражните постапки.

— реклама —

Од институцијата посочуваат дека учеството овозможува директно запознавање со новите технолошки алатки и меѓународните практики што би можеле да се применат и во работењето на македонските истражни органи.

Во фокусот на конференцијата се и потребата од координирани истраги, навремена размена на податоци и заеднички стратегии за откривање на сторителите на кривични дела поврзани со организираниот криминал и корупцијата.

Од Управата за финансиска полиција нагласуваат дека меѓународната соработка и примената на современи технологии се важни за зајакнување на институционалните капацитети и заштита на националните безбедносни интереси.