МРТ најавува враќање на големи телевизиски формати: „Икс Фактор“ и „Македонски идол“ повторно на екраните
Македонската радио-телевизија подготвува освежување на програмата со враќање на познати светски телевизиски формати, меѓу кои „Икс Фактор“ и „Македонски идол“, преку кои ќе се бараат нови музички таленти и идни ѕвезди.
Уредникот на Првиот програмски сервис, Стојан Трпчевски, најави дека се договорени три светски формати, од кои два се посветени на музички натпревари.
„Македонски идол“ ќе биде насочен кон откривање нови пејачи и нивните музички приказни. Трпчевски вели дека во Македонија има голем музички потенцијал, кој ќе биде бараn преку аудициите.
На програмата ќе се врати и „Икс Фактор“, формат во кој, покрај вокалните способности, од учесниците ќе се очекуваат сценска харизма, самодоверба и способност да ја освојат публиката.
„Ова е формат за оние кои можат да се појават на сцената и веруваат дека еден обичен сон може да стане голема сцена. За овој формат не е потребен само добар глас, туку малку повеќе од тоа, а ние ќе го бараме токму тој „Икс Фактор““, изјави Трпчевски.
Третиот договорен формат е квизот „Password“ („Лозинка“), во кој натпреварувачите преку асоцијации ќе се обидуваат да ги погодат зададените поими.
Покрај трите светски формати, МРТ подготвува и нови информативни и забавни содржини. Најавени се три нови информативни формати, меѓу кои „Без наслов со повод“, емисија во која новинари ќе коментираат актуелни теми.
Во програмата се предвидува и враќање на детската радиодрама и детскиот хор, како и повторно организирање фестивали за деца и возрасни. На екраните треба да се врати и викенд-емисијата „Женски муабети“.
Во попладневниот и вечерниот термин ќе има и подкасти со познати новинари, музичари, актери и гости од различни области.
„Имаме амбициозен план – МРТ да биде отворена и да создаде синергија со публиката. МРТ која ќе ја почитува традицијата, но ќе гледа кон иднината“, порача Трпчевски.
