Двајца припадници на Специјалната антитерористичка единица „Тигар“ освоија високи пласмани на меѓународниот натпревар „Штит Домовине“, кој се одржува во Дубровник, Хрватска, информира Министерството за внатрешни работи.
Натпреварот се одржува од 14 до 19 септември 2026 година, а македонските припадници по успешно поминатите дводневни квалификации се пласирале во главната трка.
Главната трка била долга 28 километри, со 927 метри висинска разлика, при што натпреварувачите совладувале низа комплексни препреки кои бараат висока психофизичка и тактичка подготвеност.
Во категоријата странски натпреварувачи, припадниците на САЕ „Тигар“ го освоиле четвртото и петтото место, од вкупно девет натпреварувачи. Тие се натпреварувале со претставници од Австрија, Словенија и Унгарија, како и со припадници на Армијата на Република Хрватска.
Во генералниот пласман, од вкупно 86 натпреварувачи, македонските припадници го освоиле 23-то и 24-то место.
Од МВР посочуваат дека учеството на вакви меѓународни натпревари овозможува проверка и унапредување на физичката, психолошката и тактичката подготвеност на припадниците на единицата, како и размена на искуства со припадници на безбедносните сили од други земји.
