Македонски разузнавачки информации доведоа до заплена на 68 килограми кокаин во камион управуван од македонски државјанин во Франција

Благодарение на размената на оперативни информации меѓу македонската и француската полиција, во Франција биле запленети 68 килограми кокаин. Дрогата била пронајдена во товарно возило на наплатната станица Фонтен, управувано од 44-годишен македонски државјанин со иницијали М.Ф.

— реклама —

Од Министерството за внатрешни работи информираат дека информациите ги обезбедила Единицата за недозволена трговија со дрога при Одделот за криминалистичка полиција, по што преку Секторот за меѓународна полициска соработка и Европол биле доставени до надлежните француски органи.

— реклама —

— реклама —

Ова е втора успешна меѓународна полициска акција во период од еден месец. Претходно, соработката со грчката полиција резултирала со заплена на 324 килограми марихуана.

Од МВР оценуваат дека резултатите ја потврдуваат важноста на меѓународната полициска соработка во борбата против организираниот криминал и недозволената трговија со дрога.