Со три медали и една олимписка пофалба, македонскиот тим на млади програмери оствари одличен резултат на 38. Интернационална олимпијада по информатика во Ташкент, Узбекистан.
На натпреварувањето, кое се одржува од 9 до 16 август, учествуваат 375 натпреварувачи од 92 земји. Дамјан Давков освои сребрен медал, додека Владимир Грчев и Никола Стојковски се пласираа меѓу најдобрите и освоија бронзени медали. Виктор Максимоски доби олимписка пофалба, соопшти Здружението на информатичарите на Македонија.
Македонскиот тим на ИОИ 2026 го сочинуваат Давков од Штип, Грчев од Кочани, Стојковски од Скопје и Максимоски од Гостивар. Тим-лидери се д-р Миле Јованов и д-р Емил Станков од Факултетот за информатички науки и компјутерско инженерство.
Особено значаен е резултатот на Дамјан Давков, ученик во Математичко-информатичката гимназија. Ова е негов трет последователен сребрен медал на Интернационалната олимпијада по информатика. На првото од неговите четири учества на натпреварувањето, Давков освоил бронзен медал.
