Малолетници пиеле алкохол во локал во Карпош, еден завршил на токсикологија: Уапсени осум лица

Осум лица биле приведени во Полициската станица Карпош по полициска контрола во угостителски објект во оваа скопска општина, каде што биле затекнати малолетници во видно алкохолизирана состојба.

— реклама —

Како што информираат од Министерството за внатрешни работи, контролата била извршена вчера (1 ноември), по претходно добиени сознанија дека во објектот се точат алкохолни пијалаци на малолетни лица.

— реклама —

При проверката, полициските службеници од СВР Скопје, ЕВР – ОКР Карпош, затекнале малолетници во видно алкохолизирана состојба. Осум лица биле приведени во полициската станица, а алкотестирањето покажало присуство на алкохол во организмот кај сите нив.

— реклама —

Едно од лицата присутни во угостителскиот објект било пренесено на Клиниката за токсикологија при Клиничкиот центар „Мајка Тереза“, каде што му била укажана лекарска помош.

Од МВР посочуваат дека по целосното документирање на случајот ќе биде поднесен соодветен поднесок согласно член 204 од Кривичниот законик, кој се однесува на „Точење алкохолни пијалаци на малолетници“.