Портпаролот на ВМРО-ДПМНЕ, Валентин Манасиевски, реагираше на изјавата на Љупчо Николовски во врска со тужбата и обвинувањата за кои двајцата имаат спротивставени ставови.
Манасиевски порача дека за тоа дали неговите тврдења се точни или неточни ќе одлучува судот, а не Николовски.
„Љупчо, кукавиците бегаат и се кријат. За тоа дали моите аргументи се вистинити или лажни ќе каже судот, а не ти“, наведе Манасиевски.
Тој во реакцијата постави повеќе прашања до Николовски, меѓу кои и за наводен луксузен дуплекс стан во Дајмонд мол, како и за ангажманот на негов бербер како советник додека бил член на Владата.
Манасиевски праша и дали Николовски влијаел врз фирмата „Лариком шпед“, за која тврди дека во една година го зголемила приходот за 1.100 отсто.
Во реакцијата се осврна и на прашањата поврзани со кусокот на жито и набавката на жито од соседна држава, како и со наводен грант од ИПАРД за фирмата „Тргопродукт“.
Манасиевски ја доведе во прашање и веродостојноста на наодот за душевна болка, поврзувајќи го со лекарот Бајрактаров и неговите наводни партиски врски.
„Ти треба да дадеш одговори на многу прашања, не јас“, порача Манасиевски.
На крајот од реакцијата тој го повика Николовски да се повлече од политиката доколку, како што наведува, навистина претрпел душевна болка поради неговите прес-конференции.
