Портпаролот на ВМРО-ДПМНЕ, Валентин Манасиевски, денеска упати критики кон лидерот на СДСМ, Венко Филипче, обвинувајќи го дека заедно со бугарскиот претседател Румен Радев инсистира на уставни измени, додека европските претставници ги поздравуваат реформите што ги спроведува македонската Влада.
Според Манасиевски, Македонија во последниот период добива позитивни оценки и признанија од функционери на земјите членки на Европската Унија, кои, како што рече, ги следат реформските процеси и ја препознаваат земјата како лидер во регионот.
„Сите од ЕУ со внимание ги следат реформите на македонската влада и ги поздравуваат, велејќи дека сме лидери во регионот. Само Филипче и Радев велат дека единствена реформа се уставните измени“, изјави Манасиевски.
Тој оцени дека по, како што рече, период на „коленичење и лековерност“ за време на претходната власт предводена од СДСМ, европските претставници сега гледаат поинаков пристап од актуелната влада предводена од ВМРО-ДПМНЕ и сметаат дека земјата заслужува предвидлив европски пат.
Манасиевски истакна дека СДСМ и Венко Филипче, според него, ја отежнуваат позицијата на државата и наместо да застанат зад националните интереси, дејствуваат во насока што им одговара на бугарските власти.
Во обраќањето, тој упати и прашање до СДСМ и Филипче што уште се подготвени да направат, како што наведе, „на штета на Македонија“, обвинувајќи ги дека не работат во интерес на државата.
Од СДСМ засега нема реакција на обвинувањата изнесени од ВМРО-ДПМНЕ.
