ВМРО-ДПМНЕ денеска преку прес-конференција на членот на Централниот комитет Валентин Манасиевски упати остри критики кон Социјалдемократски сојуз на Македонија и лидерот Венко Филипче, обвинувајќи ги дека „повеќе кодошат во Бугарија отколку што работат за Македонија“.
Манасиевски изјави дека СДСМ и Филипче, според него, немаат поддршка од граѓаните и затоа „се свртеле да одработуваат за странски држави и партии“.
„СДС и Филипче свесно шират какафонија во медиумскиот простор, бидејќи се загубени и немаат што да понудат на граѓаните, освен лаги, измислици и манипулации“, рече Манасиевски.
Тој посочи дека СДСМ тврди оти уставните измени се последниот чекор кон членство во Европска Унија, додека, како што рече, бугарскиот премиер Румен Радев во јавните настапи најавува дополнителни барања од Бугарија.
„Дека уставните измени се последната пречка за Македонија, веруваат само Венко Филипче и лојалистите на Зоран Заев“, изјави Манасиевски.
Во обраќањето, тој оцени дека СДСМ и Филипче „по стапките на Заев“ би направиле нови отстапки само за да дојдат на власт.
„Тоа што Заев го започна, Филипче нема никаков проблем да го заврши“, рече Манасиевски.
Од ВМРО-ДПМНЕ порачаа дека ваквите политики носат „низок рејтинг и исчезнување од политичката сцена“ и ги повикаа СДСМ и Филипче „да застанат во одбрана на македонскиот идентитет, интегритет и достоинство“.
