Портпаролот на ВМРО-ДПМНЕ, Валентин Манасиевски, денеска на прес-конференцијата обвини дека СДСМ, Левица и ДУИ намерно го блокирале донесувањето на Изборниот законик со цел, како што рече, на следниот изборен циклус да се претстават како жртви и оштетени.
Според Манасиевски, стравот од изборен пораз ги обединил трите опозициски партии, кои, како што наведе, го спречиле носењето на еден од најважните закони што се однесуваат на политичките партии.
Тој истакна дека Владата покажала подготвеност за постигнување консензус и обезбедила простор за договор, но, според него, опозициските партии се определиле за опструкции.
„Иако како никогаш досега имаа партија на власт која им порача да се договорат за решенијата што ги сакаат и дека тие ќе бидат прифатени, тие тоа го одбија“, изјави Манасиевски.
Портпаролот на ВМРО-ДПМНЕ додаде дека европските претставници ја оцениле Македонија како лидер во спроведувањето на Реформската агенда и посочиле дека државата ќе добие најмногу средства од Планот за раст поради реализираните реформи. Според него, и покрај повиците за политички консензус околу Изборниот законик, СДСМ, Левица и ДУИ одлучиле да го блокираат неговото донесување.
Манасиевски порача дека, според ВМРО-ДПМНЕ, политиката на претставување како жртва нема да им донесе политичка корист на опозициските партии.
