Маскиран маж влегол на забава во Германија, претепал и избодел 45-годишник

Германската полиција го уапси мажот осомничен за смртоносниот напад врз 45-годишен маж во баварскиот град Кобург. Осомничениот бил приведен во средата вечерта, еден ден откако маскиран напаѓач насилно влегол во стан за време на приватна забава и го нападнал мажот.

— реклама —

Според досегашните резултати од истрагата, напаѓачот прво го удирал 45-годишникот со тап предмет, а потоа му нанел убодна рана во горниот дел од телото. По нападот избегал во непознат правец.

Случајот се случил во ноќта меѓу понеделникот и вторникот во станбена зграда на улицата „Розенгасе“. Жртвата била на приватна забава со уште неколку лица во станот на свој познаник, кога маскираниот маж насилно влегол.

— реклама —

Итната медицинска помош била повикана околу 2:30 часот. Лекарите го реанимирале тешко повредениот маж, по што тој бил пренесен во болница. Таму, во вторникот наутро, починал од здобиените повреди.

— реклама —

По нападот, полицијата започнала голема потрага, при што во текот на вторникот било пребарувано и подрачјето во центарот на Кобург поради можни докази поврзани со случајот. Од полицијата тогаш соопштиле дека нема индикации за конкретна опасност за населението.

Осомничениот бил уапсен во Кобург во средата вечерта, во акција во која учествувале и специјални полициски сили од Средна Франконија.

Полицијата засега не соопшти колку години има осомничениот, ниту дали ја познавал жртвата. Не се познати ниту мотивот и околностите што му претходеле на нападот. Криминалистичката полиција во Кобург ја продолжува истрагата под раководство на надлежното обвинителство.