Маж осомничен за серија смртоносни пукања во јужна Турција се самоубил откако бил опколен од безбедносните сили, објави „Вашингтон пост“.
Според информациите, 37-годишниот осомничен, вооружен со пушка, во градот Тарсус, во провинцијата Мерсин, ги убил сопругата и уште пет лица, а ранил осуммина.
Полицијата организирала голема потрага во која биле вклучени хеликоптери и дронови, по што осомничениот бил лоциран во куќа каде што се криел. Според медиумските извештаи, тој си го одзел животот непосредно пред апсењето.
Истражителите се сомневаат дека напаѓачот прво ја убил сопругата на улица, а потоа од автомобил отворил оган кон ресторан, при што биле убиени сопственикот и еден вработен.
Подоцна, според истрагата, во друга населба убил тинејџер, 50-годишен маж и уште едно лице.
Од кабинетот на гувернерот на Мерсин соопштиле дека осомничениот имал историја на злоупотреба на супстанции и психијатриски проблеми.
Пукањата се случуваат во период на зголемено оружено насилство во Турција. Минатиот месец, во пукање во училиште во провинцијата Кахраманмараш загинаа 10 лица, додека во друг напад еден ден претходно беа ранети 16 луѓе.
