Управата за водење на матичните книги ќе ја проверува целата постапка во случајот со семејството од Пробиштип, кое било контактирано за определување име на новороденчето иако бебето починало непосредно по раѓањето.
Од Управата, во одговор за „Скопје1“, велат дека ќе се проверува правилноста на преземените дејствија, времето на доставување на податоците, примената на прописите и начинот на кој институциите комуницирале со родителите.
„Во конкретниот случај, имајќи ја предвид околноста дека новороденчето починало непосредно по раѓањето, Управата ќе ја провери правилноста на преземените дејствија и примената на прописите“, се наведува во одговорот потпишан од Фатон Фазлиу од Управата за водење на матичните книги.
Случајот се отвори откако семејството било контактирано во врска со определување лично име на бебето. Од документите со кои располага „Скопје1“ произлегува дека Управата на 27 јули испратила допис до надлежниот Центар за социјална работа, кој во Пробиштип бил примен на 20 август, со барање да се постапи по законската процедура за определување лично име доколку родителите тоа не го сториле во предвидениот рок.
Но, бебето било родено на 26 јуни, а починало на 29 јуни, по неколкудневно лекување поради екстремна предвременост.
Родителите тврдат дека никој претходно не ги известил дека треба да преземат дополнителна постапка за запишување и определување име на детето, а дополнително велат дека им била спомената и можност за казна поради задоцнета регистрација.
Токму и овој дел ќе биде предмет на проверка.
„Во однос на наводите за најавена казна, Управата ќе провери дали и на која законска основа е дадена таква информација“, велат од Матичната служба.
Од Управата нагласуваат дека евентуални прекршочни мерки можат да се преземат единствено откако целосно ќе биде утврдена фактичката состојба и ќе бидат правилно применети законските одредби.
Во оваа фаза, велат оттаму, не може однапред да се утврди дека постоел пропуст или одговорност кај конкретно службено лице.
„Доколку проверката утврди неправилности или несоодветно постапување, Управата ќе преземе соодветни мерки согласно своите надлежности и ќе ги унапреди постапките со цел спречување на слични ситуации во иднина“, се наведува во одговорот.
Од Управата дополнително потенцираат дека во случаи кои вклучуваат загуба на новороденче, институциите мора да покажат особена внимателност во комуникацијата со семејството
„Комуникацијата со граѓаните, особено во случаи на загуба на новороденче, мора да биде професионална, внимателна и со должна почит кон достоинството на семејството“, велат од Управата.
Од таму најавуваат дека по завршувањето на проверката дополнително ќе информираат за утврдените факти и евентуалните мерки.
