Човек кој исчезнал пред 17 години и бил законски прогласен за мртов, бил пронајден жив во планински предел во Бугарија, пренесуваат српските медиуми.
Станува збор за Бојан Иванов, кој исчезнал во 2008 година од неговиот роден град Русе. Откако со години немало никаква трага од него, бил прогласен за починат.
Неговото присуство било откриено од ренџери во Националниот парк Пирин, каде што живеел целосно изолиран од цивилизацијата. Според информациите, тој престојувал во добро прикриен шатор, далеку од населени места и без контакт со други луѓе.
Ренџерите останале изненадени кога го пронашле во еден од најнепристапните делови на планината, каде што, според наводите, успевал да преживее со години наназад, справувајќи се со суровите зимски услови.
Властите го потврдиле неговиот идентитет и соопштиле дека тој свесно избрал да живее во целосна осаменост.
Необичниот случај предизвика големо внимание во јавноста и отвори бројни прашања за тоа како човек успеал речиси две децении да живее надвор од цивилизацијата без да биде забележан.
