Сторителот кој беше снимен како фрла вреќи со отпад и кутии во реката Радика е идентификуван и санкциониран, информираат од Општина Дебар.
Случајот привлече внимание откако спортското риболовно друштво „Трофта“ објави видео на социјалните мрежи. На снимката се гледа маж со возило како застанува на мост над реката и фрла отпад во водата.
По објавувањето на снимката, на терен излегле екипи од општинскиот инспекторат, во координација со други надлежни институции. По преземените активности, лицето било пронајдено и казнето.
Од Општина Дебар оценуваат дека случајот претставува почеток на поодлучен пристап кон заштитата на животната средина.
„Ова не е само една санкција, туку претставува почеток на нов и поодлучен пристап. Секое лице кое ја загадува реката Радика, јавните површини или кој било друг дел од животната средина ќе се соочи со мерките и санкциите предвидени со закон“, соопштија од Општината.
Оттаму додаваат дека контролите и конкретните активности за одржување на почиста животна средина во Дебар ќе продолжат.
