Реконструкцијата на Старата скопска чаршија е во завршна фаза, при што најголем дел од предвидените работи веќе се реализирани. Проектот, вреден над 28 милиони денари, опфаќа целосно обновување на инфраструктурата и уредување на јавниот простор, со задржување на традиционалниот изглед на Чаршијата.
Градоначалникот на Општина Чаир, Изет Меџити, истакна дека со реконструкцијата се создава нов и пофункционален простор, без да се наруши историскиот идентитет на Старата чаршија.
Зафатот се реализира на површина од 1.567 квадратни метри и ги опфаќа водоводната и канализациската мрежа, електричната мрежа и оптичките влакна, како и уредувањето на просторот над подземната инфраструктура.
Предвидена е и реставрација на калдрмата со травертински камен, поставување ново традиционално осветлување и уредување на пешачките површини.
„Ветивме дека ќе ѝ го вратиме сјајот на Старата чаршија и денес резултатите се видливи. По повеќе од пет децении, реализираме темелна реконструкција, од подземната инфраструктура до конечниот изглед, притоа зачувувајќи го идентитетот што ја прави Чаршијата посебна. Со инвестиција од над 28 милиони денари, создаваме подобри услови за граѓаните, занаетчиите, бизнисите и посетителите“, изјави Меџити.
По завршувањето на реконструкцијата, Чаршијата ќе има обновена инфраструктура и пофункционални јавни површини, додека ќе бидат зачувани нејзините историски и автентични вредности.
