Медведев: Самото прифаќање разговори е победа за Иран

Подготвеноста на американскиот претседател Доналд Трамп да разговара за предлогот од десет точки за ставање крај на војната со Техеран претставува „победа“ за Иран, оцени поранешниот руски претседател Дмитриј Медведев.

— реклама —

Во објава на Телеграм, Медведев, кој сега е заменик-претседател на Советот за безбедност на Русија, посочи дека и покрај претходните остри закани од Вашингтон, на крајот „превладал здравиот разум“.

„Самото тоа што Трамп прифати да разговара за планот од десет точки е победа за Иран“, напиша Медведев, додавајќи дека останува неизвесно дали САД навистина ќе го прифатат предложениот договор.

— реклама —

Тој изрази сомнеж дека договорот ќе биде целосно реализиран, предупредувајќи дека постои ризик од нови судири. Според него, актуелното примирје е „кршливо“ и се одржува повеќе поради политичка нужност отколку поради реално решавање на конфликтот.

— реклама —

Медведев оцени дека Трамп не може долго да води војна без поддршка од Конгресот, што дополнително ја ограничува позицијата на САД.

Воедно, тој предупреди дека Израел може да повлече сопствени потези, бидејќи примирјето, според него, не ги решава клучните безбедносни прашања на таа земја, што ја прави ситуацијата „крајно неизвесна“.

Претходно, Трамп објави двонеделно запирање на нападите врз Иран, условено со повторно отворање на Ормутски теснец – клучна рута за глобалната нафтена трговија, што беше затворена поради ескалацијата на конфликтот.