Меси со еврогол за пресврт, но Интер Мајами остана без победа во судиското продолжение

Лионел Меси уште еднаш ја покажа својата класа со фантастичен погодок од далечина, но Интер Мајами остана без победа во самиот финиш од натпреварот против Нешвил, кој заврши 2:2.

Гостите го отворија натпреварот уште во четвртата минута, кога Сем Сариџ погоди за водство од 0:1.

— реклама —

Интер брзо се врати во игра. Во 19. минута дефанзивецот на Нешвил, Рид Бејкер-Вајтинг, несреќно ја испрати топката во сопствената мрежа за израмнување.

— реклама —

Меси беше блиску до целосен пресврт уште во 27. минута. Неговиот силен удар од далечина закачи еден од противничките фудбалери, па на паузата резултатот остана 1:1.

Моментот на натпреварот пристигна во 62. минута. Родриго де Пол го пронајде Меси, а Аргентинецот со првиот допир испрати прецизен дијагонален удар со левата нога од околу 18 метри и го совлада голманот на Нешвил за 2:1.

— реклама —

Тоа беше 19. погодок на капитенот на Интер Мајами во актуелната сезона на МЛС и изгледаше дека ќе биде доволен за трите бода.

Но, Нешвил имаше последен одговор. Во првата минута од судиското продолжение повторно погоди Сариџ, кој со својот втор гол на натпреварот го постави конечниот резултат 2:2 и го спречи славјето на домашните навивачи.

Со ремито, Нешвил ја продолжи серијата без пораз против Интер Мајами на четири последователни натпревари и ја задржа предноста од девет бода во однос на клубот од Флорида на табелата во Источната конференција.