На 21 мај годинава, во тешка сообраќајна несреќа на скопската обиколница, животите ги загубија Петар Миланов, Адам Велков, Марко Ѓорѓиевски и Ристе Велков. Три од жртвите беа млади момчиња на 20 години, а Ристе Велков, таткото на Адам и познат оперски баритон, имаше 51 година.
Неколку месеци по трагедијата, нивниот пријател, младиот гитарист Филип Гечовски, својот прв солистички концерт ќе им го посвети токму ним.
Концертот на класична гитара е закажан за 27 октомври во 19 часот во Македонската филхармонија во Скопје, а ќе биде одржан „за вечна благодарност и сеќавање“.
Во посветата за концертот, Гечовски открива дека Петар, Адам, Марко и Ристе требало да бидат меѓу луѓето во првите редови на неговиот прв солистички настап.
„Отсекогаш, кога го замислував мојот прв солистички концерт, во мислите ве гледав вас во првите редови. Знаев каде би седеле, ги замислував вашите погледи, вашите насмевки и она чувство дека сте тука, со мене, како и многупати досега. Сакав по концертот да ги споделиме впечатоците, да се насмееме и повторно да направиме некој од нашите планови за деновите што доаѓаа. Животот, за жал, го напиша својот план поинаку“, пишува Гечовски.
Тој се потсетува на дружењата, разговорите, смеата, желбите и соништата што ги делеле, како и на обичните денови за кои, како што вели, човек дури подоцна разбира колку биле бесценети.
„На 21 мај, еден миг ги прекина тие соништа. Но не може да го избрише времето што го имавме. Не може да ја избрише љубовта. Не може да ги одземе спомените“, стои во посветата.
Трагедијата се случи на скопската обиколница, каде што во судир со товарно возило загинаа четворицата. Петар Миланов, Адам Велков и Марко Ѓорѓиевски беа другари и поранешни ученици во скопската гимназија „Никола Карев“. Ристе Велков беше оперски солист-првенец и татко на Адам.
Сега, наместо да седат во првите редови на концертот што нивниот пријател го замислувал заедно со нив, нивните места ќе останат празни.
„Петар, Адам, Марко и Ристе, вечерва вашите места во првите редови се празни, но во моето срце вие сте тука. Затоа овој концерт денес го посветувам на вас. Сакам да верувам дека секоја нота ќе стигне некаде каде што повторно ќе можеме да се сретнеме“, пишува Гечовски.
Посветата завршува со зборовите:
„За сите наши разговори, за сите наши недоживеани денови, за сите соништа што останаа да чекаат, и за љубовта која останува. За вас, Петар, Адам, Марко и Ристе. Секогаш.“
Филип Гечовски е роден во 2005 година, а класична гитара изучува од деветгодишна возраст. Средното музичко образование го завршил во ДМБУЦ „Илија Николовски-Луј“ во Скопје, а во моментов е студент на трета година на Факултетот за музичка уметност при Универзитетот во Ниш. Зад себе има повеќе награди на меѓународни натпревари по класична гитара.
Неговиот концерт на 27 октомври ќе биде повеќе од прв солистички настап – ќе биде музичка посвета на четири луѓе кои требало да бидат таму, во првите редови.
