„Мицкоски и Клековски од екскурзија ја пуштија водата во Гостивар“, велат од СДСМ

СДСМ преку соопштение реагира на начинот на кој власта го одбележа укинувањето на забраната за користење на водата за пиење во Гостивар, обвинувајќи ги премиерот Христијан Мицкоски и министерот за здравство Азир Алиу за отсуство во текот на кризата.

Од партијата велат дека наместо највисоките државни функционери, пред камерите вода пиеле други претставници на институциите, што СДСМ го оценува како несоодветно однесување со оглед на сериозноста на кризата.

— реклама —

„Во Гостивар вчера видовме слика што ќе остане запаметена. Политичари и функционери држат здравица. Пијат вода пред камери“, наведуваат од СДСМ.

— реклама —

Од опозициската партија потсетуваат дека забраната за користење на водата траеше повеќе недели, при што, според нивните наводи, илјадници граѓани имале здравствени проблеми, а дел од пациентите биле хоспитализирани и префрлани на лекување во Тетово.

СДСМ дополнително го критикува и начинот на кој било демонстрирано дека водата повторно е безбедна за пиење, посочувајќи дека пред камерите вода пиел директорот на Дирекцијата за заштита и спасување Стојанче Ангелов.

— реклама —

Од партијата тврдат дека сè уште нема јавно објавен документ со кој се потврдува исправноста на водата и поставуваат прашање зошто претходно било најавувано дека резултатите ќе бидат достапни на 20 август, а потоа било соопштено дека условите за укинување на забраната се исполнети порано.

СДСМ бара надлежното Обвинителство да постапи по поднесените кривични пријави и да утврди врз основа на кои анализи и документи е донесена одлуката дека водата во Гостивар е безбедна за пиење.

„Оваа ситуација бара одговорност, а не циркуз. Граѓаните не бараат здравица. Граѓаните бараат одговорност“, порачуваат од СДСМ.