Премиерот и лидер на ВМРО-ДПМНЕ, Христијан Мицкоски, обвини дека опозицијата се обидува да го блокира Изборниот законик и реформските процеси, оценувајќи дека таквите потези се насочени против европската перспектива на државата.
Во објава на социјалните мрежи, Мицкоски истакна дека, според него, одредени политички структури се обидуваат да го попречат напредокот на Македонија, но изрази уверување дека земјата и натаму ќе продолжи со реформите и ќе обезбеди средства од европските фондови.
Тој наведе дека предложениот Изборен законик бил подолг период усогласуван со опозицијата и дека во него биле прифатени сите нивни предлози, освен прашањето за електронско гласање на дијаспората.
„Единственото нешто што го побаравме е дијаспората да може да гласа по електронски пат уште на следните претседателски избори. Прво го прифатија, а денес го блокираат“, напиша Мицкоски.
Премиерот ја повика опозицијата да предложи амандмани за прашањата поврзани со начинот на заокружување и поднесувањето приговори, посочувајќи дека тие би биле прифатени, со цел Изборниот законик да биде донесен.
Мицкоски оцени дека електронското гласање на дијаспората е важно за нејзиното учество во изборните процеси и порача дека опозицијата има можност да покаже вистинска поддршка за европската иднина на државата преку спроведување на реформите.
