Нема двотретинско мнозинство за законот за ЈО, нема ново Пржино, што сте дробеле тоа и ќе сркате, ќе бидете први соседи на Катица, порача Мицкоски преку видео порака.
Лидерот на опозициската ВМРО-ДПМНЕ преку видео порака објавена на Фејсбук ѝ порача на власта дека нема да има двотретинско мнозинство за законот за Јавно Обвинителство и воопшто да не се надева дека до решение ќе се дојде преку некое ново „Пржино". Во најавите на власта дека ако не се донесе законот, „план Б“ е да се избере в.д. шеф на СЈО преку измени во акутелниот закон, Мицкоски препознава задни намери на власта со две цели., објави dw.com.
„Првата е политичка - да се пресметаат преку инсталациите во Обвинителството со политичките неистомисленици. Втората е да го заштитат криминалот којшто ќе го стават зад себе, а обвинителскиот систем да им биде слуга. Тоа така не може, и тоа така нема да помине“, порача Мицкоски.
Тој децидно отфрли какви било политички преговори за законот за ЈО.
„И ако се надеваат на некакво ново Пржино, на некаков нов договор на кој ќе се повтори реприза на ослабеното ВМРО-ДПМНЕ кое ќе потпишува сѐ и сешто, надополнето со по некој преторијанец во преговарачкиот тим, треба да знаат дека тој филм нема да го гледаат. Јас ви ветувам правда, а за правдата не планирам никаков компромис“, порача лидерот на ВМРО-ДПМНЕ.
