Microsoft тивко го блокираше трикот за инсталирање Windows 11 без онлајн сметка

Корисниците кои сакаат да го инсталираат Windows 11 без да креираат или да се најават со Microsoft сметка останаа без уште една едноставна можност. Компанијата тивко го отстрани трикот со кој преку еден клик можеше да се прескокне задолжителната најава за време на почетното поставување на оперативниот систем.

Досега, корисниците можеле да ја изберат врската „Learn more“ („Дознајте повеќе“) на екранот за најавување. Наместо да ги одведе до дополнителни информации, таа ги пренасочувала кон екран за создавање локална сметка.

— реклама —

На тој начин, при инсталацијата на Windows 11 можело да се избере локално корисничко име, да се постави лозинка, да се одговорат безбедносни прашања и да се заврши постапката без внесување корисничко име или лозинка за Microsoft сметка.

— реклама —

По најновата промена, врската сега отвора страница на која се објаснува како компанијата управува со корисничките податоци. Со тоа, уште една можност за заобиколување на задолжителната најава е отстранета.

Промената била спроведена неодамна, тивко и преку серверите на компанијата, објави Боб Пони на социјалната мрежа Bluesky. Тој само еден месец претходно открил нов начин за прескокнување на задолжителната најава со Microsoft сметка во изданието Windows 11 Home.

— реклама —

Овој потег е дел од континуираните напори на Microsoft да ја направи онлајн сметката задолжителна при почетното поставување на Windows 11 на компјутерите наменети за домашните корисници.

Локалните сметки сè уште се поддржани до одреден степен, но нивното создавање станува покомплицирано. Корисниците сега мора да имаат техничко знаење за користење алатки од други производители и командната линија или да користат деловни изданија на Windows, наместо верзиите наменети за пошироката јавност.

Најавувањето со Microsoft сметка има и одредени предности, меѓу кои полесно поврзување со услугата OneDrive, апликацијата Copilot и другите производи на компанијата. Сепак, со ограничувањето на можностите за создавање локална сметка се намалува слободата на избор на корисниците кои претпочитаат да го користат својот компјутер без поврзување со онлајн сметка.