Ексдиректорот на УБК, Сашо Мијалков ќе добие домашен притвор, откако СЈО даде согласност да му се одреди полесна мерка за обезбедување присуство, дознава „Скопје 1“.
Како живеалиште, во личната карта на Мијалков е впишана адресата на хотелот „Мериот“, велат извори за „Скопје 1“, кои додаваат дека тој таму ќе остане и за Нова година. Со оглед дека во склоп на хотелот има и други угостителски објекти, Мијалков ќе може Новата година да ја дочека во убаво друштво, на добра забава.
Од судот немаа дециден одговор дали уште денеска може да се очекува одлука или евентуално во понеделник. Мијалков засега е единствениот од случајот „Империја“ кој е во притвор.
Тој оваа мерка ја доби на 2 декември, откако претходно му беше укинат за предметот Тврдина – Таргет. Инаку, денеска Апелацискиот суд во претпладневните часови на затворена седница го укина притворот за Миле Јанакиевски и Кирил Божиновски – двајцата обвинети во предметот Титаник 1.
Во домашен притвор заминуваат и Зорица Арсовска и Ненад Јосифовиќ кои исто така беа притворени за истрагата „Империја“. Тие им се придружија на Орце Камчев и Цветан Панделевски, кои од вчера ја напуштија Шутка. Кон обвинетите е изречена и мерка на претпазливост – привремено одземање на патна или друга исправа за преминување на државната граница.
