Микробиологот Никола Пановски преку објава на социјалните мрежи побара од министерот за здравство да ги извести медиумите повеќе да не го бараат за коментари и совети поврзани со состојбата во Гостивар, оценувајќи дека од денес јавноста треба да ја информираат епидемиолози и инфектолози.
Пановски наведува дека во изминатиот период дал бројни изјави за повеќе телевизии, радија и портали, а на дел од медиумите им се извинил бидејќи физички не можел да одговори на сите барања.
„Јавно го замолувам министерот за здравство да ги предупреди медиумите да не ме бараат повеќе за совети и изјави. Од денес нека си бараат исклучиво епидемиолози и инфектолози. Многу би ви бил благодарен, зашто навистина ми е тешко да ги одбијам, а тие инсистираат“, напиша Пановски.
Тој посочува дека неговите препораки биле прифатени, но со задоцнување.
„Мојот прв совет, да прогласите епидемија, го прифативте по 10 часа. Истата требаше да се прогласи два дена порано. Мојот втор совет, веднаш да се објават резултатите, ОЈО го прифати по 10 часа“, наведува Пановски.
Во објавата тој поставува прашање и зошто за присуството на фекални бактерии во јавноста говореле лица кои, како што вели, не се доктори по медицина.
„Конечно, зошто лица кои воопшто не се доктори даваат изјави и одговараат ‘хипотетично’ за фекални бактерии, иако не се доктори по медицина“, пишува Пановски.
На крајот од објавата, во ироничен тон, додава уште една препорака.
„Мој последен совет, покрај епидемиолози и инфектолози, ставете и стоматолози“, напиша Пановски.
