Мила Петрушевска избрана за претседателка на Клубот на млади на ЗНАМ

Мила Петрушевска, магистер по правни науки од областа на казненото право и членка на Советот на Општина Куманово, е избрана за претседателка на Клубот на млади на Движењето ЗНАМ – За наша Македонија. Изборот беше направен на Првата изборна конференција на клубот, што денеска се одржа на Пелистер.

Од партијата посочуваат дека формирањето на Клубот на млади е дел од нивниот Акциски план, со цел воспоставување организирана младинска структура преку која младите ќе можат да ги изразуваат своите ставови, да предлагаат иницијативи и да учествуваат во креирањето на политиките на движењето.

— реклама —

Петрушевска истакнала дека функцијата ја прифаќа како одговорност и дека нејзин приоритет ќе биде создавање организација што ќе ги слуша потребите на младите и ќе им овозможи услови за личен и професионален развој.

— реклама —

„Мојата цел е да изградиме подмладок во кој младите нема само да бидат присутни на фотографии и настани, туку навистина ќе учествуваат, ќе предлагаат идеи и ќе имаат можност да влијаат врз одлуките“, изјави Петрушевска.

Таа најавила активности на терен, едукации, обуки и поддршка за младите, со цел нивно поголемо учество во заедницата.

— реклама —

На конференцијата се обратил и претседателот на ЗНАМ, Максим Димитриевски, кој ја нагласил важноста на вклучувањето на младите во политичкиот и општествениот живот и создавањето можности за нови генерации лидери.

— реклама —

„На младите не треба само да им ја препуштиме иднината, треба да им дадеме можност уште денес да ја создаваат“, рече Димитриевски.

На конференцијата било избрано и Координативното тело на Клубот на млади, кое заедно со претседателката ќе работи на утврдување приоритети, воспоставување организациска структура и спроведување активности за поголемо младинско учество.