Претседателот на Општинската организација на СДСМ Карпош, Панче Милевски Панта, денеска јавно побара одговори од градоначалникот Сотир Лукровски, прашувајќи зошто не им се обраќа на граѓаните и дали е во состојба да ја извршува функцијата.
Според Милевски, официјалното боледување на Лукровски завршило на 29 мај, но оттогаш тој не се појавил на работното место, а јавноста не добила објаснување за причините за неговото отсуство, ниту информација кој ја раководи Општина Карпош во меѓувреме.
„Не навлегуваме во ничија здравствена состојба и на секој човек му посакуваме добро здравје. Но, граѓаните имаат право да знаат дали градоначалникот е способен да ја извршува функцијата за која е избран и дали општината има активно раководство“, порача Милевски.
Од СДСМ оценуваат дека Карпош се соочува со институционален хаос, а вината ја лоцираат кај, како што велат, лошите кадровски и политички одлуки на ВМРО-ДПМНЕ и премиерот Христијан Мицкоски.
Тие упатија повик до Лукровски, доколку не е во можност да ја извршува градоначалничката функција, да покаже лична и политичка одговорност, јавно да ѝ се обрати на јавноста и да поднесе оставка.
„Со тоа ќе се овозможат услови граѓаните на Карпош сами да одлучат кој ќе ја води општината во наредниот период. Карпош заслужува функционална општина и институции што работат во интерес на граѓаните, а не на партиските калкулации“, истакна Милевски.
