По десет години минати на снимањето на една од најпопуларните серии на денешницата, Мили Боби Браун отворено проговори за емоциите што ги почувствувала по завршувањето на серијата „Stranger Things“ и за стравот дека ќе се оддалечи од своите колеги.
Популарната серија, која се прикажуваше на Нетфликс цела деценија, заврши кон крајот на 2025 година со големо двочасовно финале. Браун практично порасна на снимањето, бидејќи имаше само 12 години кога беше емитувана првата сезона.
Заедно со неа, низ годините созреваа и нејзините колеги Фин Вулфхард, Кејлеб Меклафлин, Сејди Синк, Гејтен Матарацо и Ноа Шнап. Иако јавноста ги смета за исклучително блиска екипа, актерката признала дека стравувала дека по завршувањето на серијата ќе престанат редовно да комуницираат.
Во гостување во поткастот „Happy Sad Confused“, таа открила дека во јануари им испратила порака на сите за да провери дали нивното пријателство останува исто.
„Веројатно мислеа дека сум луда. Ги прашав нешто во стилот: ‘Сè уште сме пријатели, нели? Нема да престанете да ми се јавувате?’ Им реков и дека ми е жал ако некогаш сум ги вознемирила и само се обидував да ги изгладам работите“, изјавила Браун.
Актерката признала дека периодот по завршувањето на снимањето бил многу тежок за неа.
„Поминаа десет години и навистина сакам да останеме пријатели. Тие ми се како браќа и сестри. Бев на плажа, беше прекрасно, а јас само седев и плачев. Тоа беше многу тежок период за мене“, рекла таа.
Браун истакнала дека малкумина можат да разберат како е да се биде дел од „Stranger Things“.
„Почнав да ја снимам серијата кога имав десет години. Тој лик бев јас, а тие луѓе беа поприсутни во мојот живот отколку моето сопствено семејство. Ги гледав почесто отколку што одев дома на вечера со моето семејство. Да се простиш од сето тоа по десет години беше исклучително емотивно и Единаесет ќе ми недостига повеќе од сè“, изјавила актерката.
Ѕвездата открила и дека по завршувањето на серијата се соочила со блага депресија.
„Западнав во некаква блага, блага депресија. Ми беше навистина тешко. Не го очекував тоа по крајот на серијата. Инаку сум многу опуштена личност“, признала Браун.
