Милијарден договор за модернизација на германските вооружени сили

Германските вооружени сили нарачаа пешадиска опрема во вредност од 1,04 милијарди евра од компанијата „Рајнметал“ (Rheinmetall), соопшти таа компанија во понеделник.

Нарачката ја опфаќа опремата позната како „Infantryman of the Future – Enhanced System“, се наведува во соопштението.

— реклама —

Порачката вклучува панцири, униформи и уреди за ноќно набљудување монтирани на шлемови или оружје, како и таблети што војниците ги носат за преглед на непријателските позиции, пренесува dpa.

Во системот има и софтвер кој им овозможува на командантите во реално време да ги следат позициите на сопствените сили и на непријателот.

— реклама —

Пешадиските системи, наменети за околу 8.600 војници, треба да бидат испорачани меѓу ноември 2027 и декември 2029 година.

— реклама —

Оваа нарачка е дел од поширок рамковен договор од 3,1 милијарди евра.

Дигиталното вмрежување на пешадијата станува сè поважно во современото војување, бидејќи овозможува координација со сателити, дронови, тенкови и артилерија, како и брзо добивање информации.

— реклама —

„Рајнметал“ овој систем на меѓународниот пазар го нуди под името „Гладиус 2.0“.

По инвазијата на Русија врз Украина, „Рајнметал“ во последните години обезбеди рекорден обем на нарачки, поттикнат од зголемената потрошувачка за одбрана во Германија за тенкови, муниција и сателити.