Поранешниот брод на Јосип Броз Тито, „Галеб“, повторно е во центарот на вниманието, но овој пат поради новите трошоци за неговата долготрајна реконструкција. Градот Риека распиша нов тендер вреден повеќе од половина милион евра со вклучен ДДВ за дополнителни работи што треба да се извршат пред бродот конечно да биде отворен за посетители.
Пред отворањето, „Галеб“ ќе биде пренесен во бродоградилиште, каде што ќе се санира оштетувањето настанато при судир со турски брод во февруари. Воедно ќе бидат извршени инспекции на трупот и сите неопходни работи за добивање на потребните сертификати од Хрватскиот регистар на бродови.
Од Градот Риека велат дека поправките и задолжителните инспекции се обединети во една јавна набавка за да се избегнат дополнителни трошоци.
Во меѓувреме продолжуваат подготовките за музејската поставка. Се монтираат изложбени панели, витрини, мултимедијална опрема и се изведуваат завршните внатрешни работи, а целта е посетителите да добијат автентичен приказ на изгледот на бродот од времето кога го користел Тито.
Според кустосите, мебелот, светилките, завесите, подовите и останатите оригинални елементи се реставрирани за да се зачува историскиот изглед на пловилото.
И покрај тоа што градските власти најавуваат дека музејот треба да биде завршен до крајот на годинава, проектот и понатаму предизвикува поделени реакции во јавноста. Од почетокот на реконструкцијата роковите беа поместувани повеќепати, а според различни пресметки вкупната вредност на проектот достигнува меѓу 15 и речиси 22 милиони евра.
„Галеб“ првично требаше да биде отворен во 2020 година, кога Риека беше Европска престолнина на културата, но шест години подоцна музејот сè уште не ги примил првите посетители.
Дел од граѓаните сметаат дека бродот претставува значаен историски симбол кој треба да биде зачуван, додека други оценуваат дека милионските вложувања можеле да бидат насочени кон поважни јавни проекти, како што се инфраструктурата или домовите за стари лица.
Историјата на „Галеб“ започнува во 1930-тите години, кога во Италија бил изграден како товарен брод за превоз на банани. За време на Втората светска војна служел како воен брод и минополагач, а по војната бил обновен и станал пловечка резиденција на југословенскиот претседател Јосип Броз Тито.
Со него Тито патувал низ Европа, Африка и Азија, при што бродот одиграл значајна улога во неговите дипломатски активности и во развојот на Движењето на неврзаните.
Градските власти уверуваат дека реконструкцијата конечно влегува во завршна фаза и очекуваат музејскиот дел на „Галеб“ да биде целосно функционален до крајот на годинава.
