Пратеникот Антонио Милошоски од ВМРО-ДПМНЕ смета дека Дрин Ахмети, внук на Али Ахмети треба да одговара за кривичното дело „недозволено изработување, држење и тргување со оружје или распскувачки материи. Тој посочи дека доколку министерот за внатрешни работи, Оливер Спасовски, не го нареди спротивното, тоа е делото за кое треба да се поднесе пријава.
„Доколку Спасовски не нареди полицаецот што го уапсил Дрин Ахмети (ДУИ) сам да се "удри во пајакот", тогаш ова е членот од Кривичниот законик што треба да се примени“, посочува Милошоски во статусот на „Фејсбук“.
Според членот на кој се повикува Милошоски, уапсениот Ахмети ќе треба да биде казнет со затвор од три до десет години доколку биде гонет и прогласен за виновен.
Пред неколку години, полицајка од МВР во обид да крене возило со пајак-служба, се здоби со повреди. Возилото беше на функционер на ДУИ. Кога требаше да образложи што се случило, таа беше на средба со Спасовски, па посочи дека се удрила од вратата на возилото. Беа побарани снимките од безбедносните камери, но тие никогаш не беа споделени со јавноста, иако истрагата беше затворена.
„Скопје1“ објави дека Дрин Ахмети беше уапсен, а споделивме и снимка од него, како и претресот во неговиот автомобил. Побаравме и одговори, зошто со него носел голема количина на пиротехнички средства, но нема одговор.
Со став излезе само МВР.
МВР за апсењето на Дрин, внукот на Ахмети: Го запреле со џипот, го провериле и нашле пиротехнички средства
Пријава до Јавното обвинителство ќе има за Дрин Ахмети, внук на Али Ахмети и тазе газда на „Соравија“. Ова од МВР го потврдуваат за „Скопје1“ и посочуваат дека пиротехничките средства му биле најдени при рутинска контрола. „Денеска (30.12.2023) во 19.50 часот на ул.„Самуилова“ во Скопје полициски службеници запреле патничко моторно возило „ренџ ровер“ со албански регистерски таблички, управувано од Д.А. (25) од с.Зајас-Кичево и при преглед на возилото се пронајдени пиротехнички средства“, велат од МВР.Тие додаваат: „Лицето е приведено во полициска станица и по документирање на случајот ќе биде поднесен соодветен поднесок“.
Македонија | пред 2 години
