Министерството за јавна администрација, во соработка со Мисијата на ОБСЕ во Скопје, ја промовираше новата рамка за вработување во јавниот сектор, која се темели на заслуги, интегритет и компетенции. Со ова, како што беше истакнато на настанот, започнува практичната примена на мерит-системот во институциите.
Министерот за јавна администрација Горан Минчев нагласи дека реформите во јавната администрација ќе имаат вистински ефект само доколку законските решенија доследно се применуваат во секојдневната работа на институциите.
„Реформите не се успешни кога остануваат запишани во законските текстови. Тие се успешни кога институциите ги применуваат, кога службениците ги препознаваат како корисни алатки и кога граѓаните ги чувствуваат придобивките од нив. Токму затоа, денес мерит-системот добива своја практична примена“, изјави Минчев.
На промоцијата беа претставени Правилникот за работните компетенции на административните службеници и Прирачникот за спроведување интервју засновано на компетенции. Според Министерството, овие документи треба да обезбедат појасни критериуми за проценка на кандидатите, поголема предвидливост на постапките и намалување на субјективноста при вработувањето.
Минчев истакна дека целта е јавната администрација да се развива врз основа на знаење, компетенции и постигнати резултати, со професионални и мотивирани службеници кои ќе обезбедуваат поквалитетни услуги за граѓаните. Тој упати благодарност до Мисијата на ОБСЕ во Скопје за континуираната поддршка во процесот на модернизација на јавната администрација.
Амбасадорот Килијан Вал, шеф на Мисијата на ОБСЕ во Скопје, оцени дека новите правила и практични алатки ќе придонесат за вработувања засновани на квалификации, испити и вештини, наместо на политички влијанија. Според него, тоа ќе придонесе за посилни институции и поквалитетни јавни услуги.
Со воведувањето на новите алатки, Министерството за јавна администрација има цел мерит-системот да стане стандард што ќе се применува во сите постапки за вработување во јавниот сектор.
