Минибус без патници, а во подот милион евра – Германец признал дека парите му припаѓаат за да ги добие назад, ама заврши во притвор

Германски државјанин признал дека е сопственик на еден милион евра кои во февруари годинава биле пронајдени скриени во специјално преработен простор во подот на минибус на граничниот премин Мердаре, меѓу Србија и Косово. Сепак, при сослушувањето не успеал да го докаже потеклото на парите, поради што му е одреден притвор.

Според соопштението на косовската полиција, осомничениот на 23 октомври се јавил на сослушување во Специјалното обвинителство на Косово, во рамки на истрагата за заплената извршена на 24 февруари 2026 година.

— реклама —

„Осомничениот за време на сослушувањето призна дека запленетите пари се негови, но не успеа да го докаже нивното потекло, ниту поврзаноста со осомничените лица кои ги превезувале“, соопшти полицијата.

Случајот започнал во февруари, кога на граничниот премин Мердаре бил запрен минибус со албански регистарски ознаки, кој се движел од Србија кон Косово. Во возилото биле пронајдени вкупно еден милион евра непријавени пари, а биле уапсени тројца осомничени.

— реклама —

Вниманието на царинските службеници го привлекол фактот што минибусот патувал без патници, поради што била извршена детална контрола.

— реклама —

При претресот бил откриен специјално направен простор во подот на возилото, во кој парите биле распоредени во 18 пакети. Банкнотите биле во апоени од 10, 20, 50, 100 и 200 евра, а на секое пакување имало испишан број.

Минибусот го управувал Е. А., додека меѓу лицата во возилото бил и А. К., полициски службеник од Тирана, кој веднаш по апсењето бил суспендиран од должноста.

Со новото сослушување истрагата е проширена и на лицето кое тврди дека е сопственик на запленетите пари.

Сите обвинети и осомничени во случајот се поврзуваат со сомневања за перење пари, а надлежните органи продолжуваат да го утврдуваат потеклото на средствата и улогата на секое од инволвираните лица.